Ən çox izlənən videolar

Nankin qırğınının 82-ci ildönümü - VİDEO, FOTOLAR

Çin xalqı Nankin qırğını qurbanlarının xatirəsini anır. 1937-1945-ci illər yapon-Çin müharibəsi dövründə Çinin o zamankı paytaxtı olan Nankində baş verən hadisələrin 82-ci ildönümü ilə əlaqədar anım mərasimi keçirilib.

Nankin qırğını qurbanlarının xatirə muzeyinin qarşısında keçirilən tədbirdə dövlət rəsmiləri, ictimaiyyət nümayəndələri, hadisələrin canlı şahidləri və qırğın qurbanlarının yaxınları, xarici qonaqlar, ümumilikdə 8 min nəfər iştirak edib. Yerli vaxtla saat 10:01-də bir dəqiqəlik sükut elan edilib.

Qeyd edək ki, Çin tərəfinin məlumatına əsasən, yapon ordusunun Nankində 1937-ci il dekabrın 13-dən yanvarın sonunadək törətdiyi qırğınlarda 300 mindən çox dinc sakin və silahsız əsgər öldürülüb, 20 min qadın təcavüzə uğrayıb.

Rəsmi Tokio isə Nankində törədilən qırğınları təsdiq etsə də, həlak olanların sayı barədə məlumatların dəqiq olmadığını və bununla bağlı müxtəlif fikirlərin mövcudluğunu bildirir. Hazırda Nankin hadisələrindən sağ çıxaraq günümüzədək yaşayan cəmi 80 nəfər qalıb.

Çinin qanunverici orqanı olan Ümumçin Xalq Nümayəndələri Yığıncağının 2014-cü ildə qəbul etdiyi qərarla hər il 13 dekabr tarixi Çində Nankin qırğını qurbanlarının xatirəsinin anım günü kimi qeyd edilir.

Bu kateqoriyadan digər videolar
Digər videolar